Showing 160 results

Tystysgrifau enillwyd gan John Edwal Williams yn ystod ei yrfa addysgiadol; yn ogystal ag amlen wag wedi'i chyfeirio at 'Mr J. Edwal Williams 8 Darley St[reet] Winter St[reet] Sheffield'. Ar ddechrau ei yrfa, bu John Edwal yn dysgu yn Ysgol Fwrdd Firs Hill, Sheffield (gweler Tystlythyrau John Edwal Williams dan bennawd John Edwal Williams).

Arysgrif yn llaw Dilys Williams, merch John Edwal Williams, ar amlen wedi'i chyfeirio at John Edwal Williams yn '12 Park Street, Upper Bangor': 'RHIFYN OLAF Y DEYRNAS TYSTYSGRIFAU DAD (J.E.W.)'. Am rifyn olaf Y Deyrnas, gweler The Welsh Outlook / Y Geninen / Y Deyrnas dan bennawd John Edwal Williams.

Cerdyn post, marc post 8 [Mehefin neu Gorffennaf] 1925, a anfonwyd at John Edwal Williams gan C. Enid Irma Roome, chwaer George William Roome, cyd-fyfyriwr i John Edwal yn y Coleg Normal, Bangor. Ceir nodyn [?yn llaw Dilys Williams] ar frig y cerdyn.

Ysgrif deipysgrif anghyflawn yn dwyn y teitl 'Two Grandfathers' gan, yn ôl pob tebyg, Jean Hunt (gynt Ware, ganed Jones) (gweler Coeden deulu Syr Henry Jones dan bennawd Angharad Williams (née Jones)). 'Roedd Jean Hunt yn wyres i'r athronydd Syr Henry Jones, ewyrth Angharad, ac i'r microsgopydd a'r bacteriolegwr Dr Griffith Evans, tad ei mam, Mair Olwen Jones (née Evans).

Llungopi o lythyr, dyddiedig 3 Gorffennaf 19[?88], at Mr & Mrs John Hughes, Llangernyw oddi wrth 'Gareth' o'r Baptist Missionary Society, Llundain yn diolch am ei ymweliad â bwthyn Syr Henry Jones, ewyrth Angharad Williams (née Jones), yn Llangernyw (am Syr Henry Jones, gweler yr enw hwnnw dan bennawd Angharad Williams (née Jones)).

Cardiau post at Dilys Williams gan amryw aelodau teuluol a chyfeillion, gan gynnwys ei chwaer Mary [Francis, née Williams], ei modryb Mwyn[lan Mai Edmond (née Jones)], Benni ac Elsie Lewis a'r Chwaer Bosco (Nora Gabriel Costigan).

Llythyr, 5 Gorffennaf [1953], at Dilys Williams oddi wrth 'Anti Lizzie' (nodyn yn llaw Dilys Williams ar frig y llythyr), sef Elizabeth Williams (ganed Watkins), yn enedigol o ardal Llandysilio-yn-Nyfed, Sir Benfro, gwraig Levi Williams, oedd yn frawd i John Edwal Williams, tad Dilys Williams. Ceir cyfeiriadau at Waldo Williams, brawd Dilys, at eu chwaer Mary [Francis, ganed Williams] ac at 'David' - o bosib David Williams, nai Dilys.

Llythyr di-ddyddiad [1970] at Dilys Williams oddi wrth yr ymgyrchydd a'r llenor Emyr Llywelyn oddi mewn i rifyn Medi 1970 o'r misolyn Barn, sy'n cynnwys erthygl gan Emyr Llywelyn yn dwyn y teitl 'Y Gymru Newydd'. Mae'r llythyr yn cyfeirio at '[g]ystudd hir' Waldo Williams, brawd Dilys, a'r ysbrydoliaeth a gafodd Emyr Llywelyn o fod yng nghwmni Waldo ac o ddarllen ei waith.

Llythyr, 2 Awst [blwyddyn heb ei nodi], at Dilys Williams oddi wrth Margaret [Snell] (née Edmond), merch Mwynlan Mai Edmond (née Jones), chwaer Angharad Williams (née Jones), mam Dilys. Cyfeirir at sawl aelod o'r teulu, gan gynnwys gwaeledd Mwynlan Mai.

Llythyr, 5 Ionawr [blwyddyn heb ei nodi], at Dilys Williams oddi wrth Margaret [Snell] (née Edmond), ynghyd â llungopïau o'r cardiau oedd ynghlwm wrth flodau angladdol Mwynlan Mai. Yn y llythyr, crybwyllir sawl aelod o'r teulu, yn ogystal â hanesyn am Waldo yn ystod ymweliad Margaret a'i chwaer Glenys ag Elm Cottage, Llandysilio-yn-Nyfed, Sir Benfro pan yn blant.

Gwahoddiad i Dilys Williams i swper fel rhan o ddigwyddiadau Gŵyl Waldo, a drefnwyd gan yr Academi Gymreig, 18-19 Ebrill 1986; ynghyd ag amserlen gweithgareddau a phoster yn ymwneud a'r Ŵyl.

Llyfr nodiadau yn cynnwys cofnodion cangen Abergwaun o Undeb y Llw o Blaid Heddwch (Peace Pledge Union), 1939-1945, y rhan helaethaf o'r cofnodion yn llaw Dilys Williams, ysgrifennyddes yr Undeb, gydag un cofnod (dyddiedig 6 Rhagfyr 1939) wedi'i lofnodi ganddi, a chofnodion 24 Mawrth 1944 ymlaen yn llaw ei brawd, Waldo Williams. Hefyd yn y gyfrol ceir derbynebau am daliadau; rhestr o aelodau'r Undeb ym mis Gorffennaf 1939; llythyr printiedig at aelod(au)'r Undeb; a thoriad papur newydd yn cynnwys cerdd Alun J[eremiah] Jones (Alun Cilie) 'Diwedd Hydref'.

Rhifyn Hydref 1968 o'r cyfnodolyn Y Genhinen. 'Miss D Williams' (nid yn llaw Dilys Williams) wedi'i ysgrifennu ar frig y dudalen flaen.

Araith ddrafft yn llaw Dilys Williams i groesawu ymwelwyr o Ddenmarc i Wdig, Sir Benfro.

Llyfr nodiadau yn llaw Dilys Williams, yn cynnwys rhestr o lyfrau ar gyfer Ymgyrch Lyfrau 1984 a nodiadau ynghylch grŵp trafod. Rhai tudalennau yn nhu blaen y gyfrol wedi'u torri allan. Mae rhan helaethaf y gyfrol yn wag.

Llungopi o doriad papur newydd (Y Cymro, 18 Chwefror 1998) yn cynnwys teyrnged i Dilys Williams.

Cerdyn post di-ddyddiad yn cynnwys cyfarchion penblwydd at dderbynnydd anhysbys oddi wrth Mary [Williams].

Llythyr, 14 Gorffennaf 1920, oddi wrth Nan a Waldo Roberts, Sgiwen, Castell-nedd Port Talbot at Gwladys [Llewellyn] yn datgan cydymdeimlad ar achlysur marwolaeth ewythr Gwladys, sef William Williams (Gwilamus), brawd John Edwal Williams, tad Waldo (gweler William Williams (Gwilamus) dan bennawd John Edwal Williams).

Cerdd lawysgrif gan ac yn llaw Waldo Williams yn dwyn y teitl 'Cân Olaf Arthur', sef Cerdd Olaf Arthur ag Ef yn Alltud yn Awstralia, rhan o'r bryddest Y Gân Ni Chanwyd, a gyfansoddwyd gan Waldo Williams tua diwedd y 1920au ond nas cwblhawyd.

Copi llawysgrif o gerdd gan ac yn llaw Waldo Williams yn cychwyn 'High above the Great West Road ...' a anfonodd Waldo fel rhodd Nadolig, 20 Rhagfyr 1948, at nai Maude Webb, prifathrawes Ysgol Gynradd Lyneham ger Chippenham, swydd Wiltshire, lle 'roedd Waldo'n dysgu ar y pryd; ynghyd â llungopi o'r gerdd. Darlunir y gerdd â phaentiad dyfrlliw gwreiddiol o Geffyl Gwyn Cherhill a Chofeb Lansdowne.

Cerdd, yn ôl pob golwg gan Waldo Williams, mewn teipysgrif yn dwyn y teitl Tua'r Gogledd. Yn ôl nodyn ynghlwm wrth y gerdd, fe'i chyhoeddwyd yn rhifyn Awst 1950 o'r cyfnodolyn Taliesin.

Copïau teipysgrif o dair cerdd gan Waldo Williams dan y teitl Oes y Seintiau, sef 'Cân I' a 'Chân II' ac 'Ymddiddan rhwng Dewi, Teilo a Cholman', ynghyd â sgôr gerddorol mewn llawysgrif ar gyfer deulais a phiano yn dwyn y teitl 'Molawd Penfro', y geiriau gan Waldo a'r gosodiad cerddorol gan Gerallt Evans. Lluniodd Waldo 'Cân I', 'Cân II' ac 'Ymddiddan rhwng Dewi, Teilo a Cholman' ar gyfer 'Molawd Penfro', sef pasiant adrannau ac aelwydydd yr Urdd Sir Benfro a oedd i'w pherfformio yn Eisteddfod Genedlaethol yr Urdd Abergwaun 1951.